Vətəndaşların qəbulu ilə əlaqədar Ağdaşa səfər çərçivəsində şəhid polkovnik-leytenant Əliyev Atəm Vaqif oğlunun ailəsini ziyarət etdik. Ailə üzvlərinin şəhidlə bağlı xatirələrini dinlədik, onun keçdiyi rəşadətli döyüş yolundan danışdıq.

Bu gün Ağdaş şəhərində Ucar, Zərdab, Ağdaş, Göyçay, Yevlax və Qəbələ rayonlarının sakinlərinin müraciətlərinə baxdıq. Məsələlərin bir hissəsi yerində öz müsbət həllini tapdı. Digər qisminin araşdırılması ilə bağlı nazirliyin qurumlarına tapşırıqlar verildi.

2024-cü ilin I rübü ərzində Azərbaycanın informasiya və rabitə sektoru üzrə gəlirlər ötən ilin müvafiq dövrü ilə müqayisədə 10,8% artaraq 766,4 milyon manat olub. Bununla da sektorun ÜDM-də payı 1,5%-dən 1,7%-ə yüksəlib.

2024-cü ilin I rübü ərzində Azərbaycanın nəqliyyat sektoru üzrə gəlirlər ötən ilin müvafiq dövrü ilə müqayisədə 14,9% artaraq 3.154,5 milyon manat olub. Bununla da sektorun ÜDM-də payı 5,5%-dən 6,8%-ə yüksəlib.

Ölkəmizdə səfərdə olan Avropa İttifaqının Mərkəzi Asiya üzrə xüsusi nümayəndəsi Teri Hakala ilə görüşdük. Nəqliyyat, o cümlədən aviasiya sahəsində və Orta Dəhliz istiqamətində əməkdaşlığın inkişafını müzakirə etdik.

Dövlət Turizm Agentliyinin sədri Fuad Nağıyevlə birlikdə Azərbaycanın turizm şirkətlərinin nümayəndələri ilə görüşdük. Səmərəli nəqliyyat sisteminin turizmin inkişafında rolunu və dövlət-özəl tərəfdaşlığının əhəmiyyətini müzakirə etdik, iştirakçıların təkliflərini dinlədik.

12 aprel Ümumdünya Aviasiya və Kosmonavtika Günüdür.
Qürurvericidir ki, Azərbaycan 50 il sonra – ötən ilin oktyabr ayında yenidən Beynəlxalq Astronavtika Konqresinə uğurla ev sahibliyi etdi. Bakı Konqresi gənclərin bu sahəyə cəlb olunması baxımından əhəmiyyətli töhfə oldu.

Müqəddəs Ramazan bayramı münasibətilə hər birinizi təbrik edir, ən xoş arzularımı çatdırıram.

Ölkəmizin rəqəmsal transformasiyasını sürətləndirən mühüm layihələrdən olan 'SİMA İmza' mobil tətbiqinin istifadəçi sayı 1 milyonu ötüb.
'SİMA İmza'nın arxasında duran komandanı təbrik edir, yeni nailiyyətlər arzulayıram.

Novruz bayramı münasibətilə hər birinizi təbrik edir, cansağlığı, xoşbəxtlik və yeni uğurlar arzulayıram. Bayramınız mübarək!

“Onlayn Azərbaycan” layihəsi çərçivəsində ölkədə 2,077 min ev təsərrüfatı və biznes subyekti yüksəksürətli internet xidmətləri ilə əhatə edilib. Bununla da layihənin 71%-i icra olunub. Nəticədə Azərbaycanda sabit genişzolaqlı internetin orta sürəti 37,3 Mbit/s təşkil edib.

Vətəndaşların qəbulu ilə əlaqədar Şəmkir rayonuna səfər çərçivəsində şəhid Mətləb Zamanovun ailəsini ziyarət etdik. Ailə üzvlərinin şəhidlə bağlı xatirələrini dinlədik, onun keçdiyi şərəfli döyüş yolundan danışdıq.

Şəmkirdə Qazax, Ağstafa, Tovuz, Şəmkir, Gədəbəy, Daşkəsən, Göygöl, Samux rayonları və Gəncə şəhərinin sakinlərinin müraciətlərinə baxdıq. Məsələlərin bir hissəsi yerində öz müsbət həllini tapdı. Digər qisminin araşdırılması ilə bağlı nazirliyin qurumlarına tapşırıqlar verildi.

Azərbaycanda səfərdə olan Almaniyanın Şərqi Biznes Assosiasiyasının və müvafiq sahədə fəaliyyət göstərən alman şirkətlərinin nümayəndələri ilə görüşdük. Nəqliyyat sahəsində əməkdaşlıq imkanları və alman şirkətlərinin ölkəmizdə fəaliyyəti ilə bağlı müzakirələr apardıq.

Xocalı faciəsi qurbanlarının xatirəsini dərin ehtiramla yad edirik.

Bakı Böyük Dəbilqə turnirinin ikinci günündə Azərbaycan cüdoçuları 2 qızıl və 1 gümüş medal qazanıblar. Hidayət Heydərov və Zelim Tçkayev qızıl medal, Ömər Rəcəbli isə gümüş medal əldə edib. Bütün qalibləri təbrik edir, komandamıza davamlı uğurlar arzulayıram.

Bu gün Beynəlxalq Cüdo Federasiyasının prezidenti Marius Vizerlə birlikdə cüdo üzrə milli komandalarımızın təlim-məşq mərkəzində olduq. Azərbaycanda cüdo idman növünün daha da inkişaf etdirilməsi istiqamətində gələcək əməkdaşlığı müzakirə etdik.

Bu gün Bakı Böyük Dəbilqə turnirinin açılışında iştirak etdik. Yarışın ilk günündə cüdoçularımız Balabəy Ağayev və Yaşar Nəcəfov bürünc medal qazandılar.
Qalib idmançıları təbrik edir və komandamıza davamlı uğurlar arzulayıram.